O Concello de Salceda é xa o propietario dun novo vehículo de loita contra incendios. Trátase dun Land Rover de cinco prazas (conductor máis catro tripulantes), con tracción ás catro rodas, equipado con dous equipos de respiración autónomos, e con un depósito de auga de 500 litros. Este vehículo, de 132 CV, incorpórase así ao parque móvil co que conta Protección Civil de Salceda de Caselas para desenvolver as súas tarefas de intervención rápida e emerxencias.

O Alcalde de Salceda, Marcos Besada, xunto co Concelleiro de Seguridade, Xose Manuel Suárez, o Concelleiro de Vías e Obras, Parques e Xardíns, Fortunato Álvarez, e representantes de Protección Civil asistiron á recepción do vehículo na Praza do Concello por parte de representantes da empresa adxudicataria. Marcos Besada manifestou a súa satisfacción pola adquisición deste vehículo, e por ver aumentados os medios materiais cos que conta a agrupación para facer fronte ás situacións de emerxencia que se lle presentan.

Pola súa banda, o Concelleiro de Vías e Obras, Parques e Xardíns manifestou que este vehículo vai servir como complemento para facer fronte ás necesidades que se presentan no seu departamento tales como baldeos, limpezas, regos, etc., grazas a ser un vehículo multifuncional.

Para esta adquisición o Concello de Salceda de Caselas aporta 16.500 euros máis IVE, e a Consellería de Presidencia da Xunta de Galicia aporta os 50.000 euros restantes.

Protección Civil conta ademáis de con este novo vehículo cun parque móvil integrado por dous todoterreos. Forman parte da agrupación 12 persoas voluntarias.