O Concello de Salceda de Caselas, ao traverso da Concellaría de Cultura e Ensino que dirixe Teresa Pérez, sumouse ás múltiples celebracións que tiveron lugar no día de onte ao longo de todo o País para celebrar o Día do Libro. No caso de Salceda o primeiro dos actos foi a presentación do libro “Entre la sombra y el abismo” do salcedense Jacobo Gómez. Trátase dunha compilación de ensaios filosóficos escritos polo autor ao longo da súa carreira universitaria na Universidade de Santiago de Compostela.

A tarde seguiu coa charla-coloquio para pais e nais coa escritora Amalia Pérez Otero, que lles axudou a interpretar os contos de sempre, a saber escoller as lecturas para os máis pequenos, e sobre todo traballou na importancia de ler cos máis cativos, estreitando así os lazos de unión entre pais/nais e fillos/fillas. O taller resultou de grande satisfacción para os pais e nais asistentes, que así o amosaron á saída do mesmo. Mentres tanto, noutra sala da mesma Casa da Cultura onde se celebraron os actos, a técnica sociocultural do Concello encargouse da organización de diversas actividades para os máis pequenos, sempre en torno ao mundo da literatura.

Teresa Pérez, Concelleira de Cultura e Ensino, destacou a importancia da celebración de actos deste tipo, que fomenten a lectura, e sobre todo como neste caso, que fomenten a interactuación entre pais e fillos, algo que non sempre se fai tanto como se debera polo ritmo de vida que levan moitas familias, con pouco tempo para adicarlle aos máis cativos. “O pracer de compartir un conto cos nosos fillos non deberiamos cambialo por nada. Sempre hai tempo para facelo, só é cuestión de organizarse”.